Tomiño rexeita por unanimidade asumir o mantemento da tubaxe de subministro do Consorcio de Augas do Louro

17/03/2024

O Concello aprobou en pleno solicitar ao Consorcio a reparación das fugas en Hospital e Figueiró desta infraestrutura alta, que están a crear problemas de seguridade viaria

O Concello de Tomiño decidiu por unanimidade en pleno rexeitar asumir o mantemento da tubaxe da rede xeral da auga, unha infraestrutura dependente do Consorcio de Augas do Louro que pasa polas PO-344 e PO-552 coa que traslada a auga dende a EDAR do Louro e se subministra a través de redes secundarias aos municipios de Tomiño, O Rosal e A Guarda. Desa tubaxe xeral, dependente do Consorcio, parten as redes secundarias, a partir das que os municipios non consorciados pagan o subministro de auga e a rede pasa a responsabilidade dos concellos.

O Concello de Tomiño solicita ao Consorcio a conservación e reparación desta tubaxe, considerada unha infraestrutura en alta, que dende hai anos presenta deficiencias e que está a provocar fugas no Barro e en Figueiró en dúas localizacións posteriores ao punto de enganche coa rede secundaria. Son unhas fugas que ademais de afectar á auga que o Consorcio subministra e vende a estes municipios está a provocar problemas de seguridade viaria na estrada.

Tomiño leva trasladando de maneira reiterada dende hai un ano a problemática tanto ao titular da vía (Xunta de Galicia) como ao propio consorcio. A fuga localizada na parroquia de Figueiró foi reparada polo servizo de mantemento da estrada, pero a situada no Barro segue sen solucionar.

Tras varias peticións por parte do concello na que se achegaban informes da policía local e mesmo unha reclamación en vía administrativa, o Consorcio respondeu que debería ser o municipio quen fixera fronte ás reparacións.

O Goberno municipal de Tomiño ratifícase en que o Concello non pode asumir en modo algún os custos de mantemento de 14 quilómetros dunha rede xeral de auga que serve fundamentalmente para dar servizo aos concellos do Rosal e da Guarda, dun servizo polo que o Consorcio cobra.

O Concello non descarta iniciar outras accións para defender os intereses dos veciños e veciñas ante o Consorcio de Augas do Louro, unha entidade que ten por cometido a Xestión do Ciclo da Auga, tanto da súa EDAR (Estación Depuradora de Augas Residuais) como da ETAP (Estación Tratamento de Auga Potable) en Guillarei.

The post Tomiño rexeita por unanimidade asumir o mantemento da tubaxe de subministro do Consorcio de Augas do Louro appeared first on Concello de Tomiño.