Tomiño realiza dous talleres de autoestima dirixidos a mulleres

17/11/2023

Xa está aberto o prazo para inscribirse a través da web municipal

O Concello de Tomiño continúa camiñando cara á igualdade e a erradicación da violencia de xénero cunha ampla variedade de actividades coa que conmemorar o 25N. Dentro deste programa, porá en marcha dous talleres de autoestima, dous obradoiros de hora e media de duración no que as participantes poderán “aprender a construír o amor propio coas técnicas máis avanzadas e efectivas de autocoñecemento: o coaching e a intelixencia emocional e corporal”.

Impartido pola coach e formadora Ana Pazo, as participantes nos talleres adquirirán unhas ferramentas sinxelas e claras coas que poder construír a súa autoestima cada día, con dinámicas prácticas doadas de integrar na súa vida cotiá.

O Concello organizará dúas quendas para este taller, unha primeira que será o mesmo 25 de novembro, Día Internacional para a Eliminación da Violencia contra as Mulleres. O segundo obradoiro celebrarase xa o vindeiro ano, o 9 de marzo. Ambos talleres serán na Casa Salgosa en horario de tarde, de 17.00 a 18.30 horas. Serán de balde e con prazas limitadas.

As persoas interesadas en participar poden inscribirse xa tanto para o taller deste mes de novembro como para o de marzo de 2024 a través da web municipal.

The post Tomiño realiza dous talleres de autoestima dirixidos a mulleres appeared first on Concello de Tomiño.